الثــأر

بــدع وليد المصري مرسل الى الشاعر محمد النصيري
الثــأر

يامن على العرش من فوق الطباق =سالك الهي بفضل الواقعة
والنور والمائدة والانشقاق =تنجني يوم نارك والعه
واغفر ذنوبي ويسر كل شاق= قلبي يخافك ونفسي طايعه
ياطاير السعد حد الانطلاق =ملفاك عند الرجال الشاجعه
اسود ماهمهم لا الوقت ضاق=سيوفهم ضد الاعدا قاطعه
والقبيلة قابلتهم بالعناق=دام الله أهل الصفات الرايعه
سلم عليهم بلهفة واشتياق= وخصهم بالحروف ألبا دعه
صقر ألحدا ذي يصون الاتفاق= وآبو أسامه نجومه ساطعة
يبن النصيري دمي زاد احتراق = من يوم شفت القبل متصارعة
الجهل ضيق على القوم الخناق=وسبب أحداث عده فاجعه
كم راحت اغمار من فعل الشقاق =وأجيال بالثار صارت ضايعه
الأم تبكي بساعات الفراق =والطفل تمسي عيونه دامعه
هذا توفى وذا عايش معاق= وذاك شارد وخصمه تابعه
والنار يشعل حماها كل عاق=ما قوتها إلا الرجال الفازعه
وكل واحد يقل عاد الغلاق =نار المضلع لخصمي طامعة
ايش السبب دمهم في الأرض راق= وروسهم بالافن متقامعه
ماحد من الزوبعة فكر وفاق=إلا ذوي العقول البارعة
ماذى جنى ذي زرع بذرة نفاق =وذي تسبب لفتنه واسعه
بين الخلايق حمل ما لا يٌطاق=في يوم تلقى النواصي راكعة
حرب القبا يل مشقه وانزلاق= بين الجرايم وقعر اللاسعه
هل من أمل يا نصيري للوفاق = والا مواقف نراها رادعة
والأمن في الشعب ما يلقى اختراق=والقوم يلقوا معيشة قانعة
وكل فاسد في الدولة يساق=والمرتشي واللصوص الجا وعه
والختم صليت ما طاف البراق= على النبي ذي صعد لا السابعة[

جواب الشاعر القدير محمد النصيري

يالله سهـل لعبـدك بالـوفـاق=بحرمـة الفاتحـه والقارعـه
وجنّبَه فتنـة النـاس الحمـاق=يامن لك الخلق تركع خاشعه
وبعد يامرحبـا غَطَـى نطـاق=الكون واملى سماه الشاسعـه
بمن ربح كل جـولات السبـاق=واجتاز كل الخطـوط المانعـه
مصري من اهل المعاليق الوثاق=والقبيله فـي جبينـه لامعـه
ياهاجسي قوم بـادر باستبـاق=الوقـت والثانيـة متسارعـه
وانطم لي الرد في نفس السياق=وحـل كلماتـه المتقاطـعـه
قال النصيري محمـد يارفـاق=الثار خلا العـرب متواجعـه
الثار لعنـة وفتنـه واشتقـاق=واللعنه اكبرمصيبـه فاجعـه
ياصبرأيوب لا ..ما الصبر طاق=ياأرض ضاقت رحاها الواسعه
يامصري الشعب عاده ما أفـآق=مُحـال تلقـى أذانا"سامـعـه
بنظرة العطف حدقـت إحتـداق=لعل نفسـك عليهـم باخعـه
ماتدري إن التراحـم والشفـاق=مقطوع وانته عيونك دامعـه
الثار ماهو مذاهـب واعتنـاق=للثار دافـع وبشـرح دافعـه
مادام والجهل ملصوق إلتصـاق=بالشعـب عقليتـه متراجعـه
والحقدوالغل هوسـاس إفتـراق=النـاس بالنازلـه الطالـعـه
وابليس لادلهف البـواق بـاق=مايخرج إلاوهـي متقارعـه
والنار تمضي بلحضة لرتشـاق=عميا ولاتدري اينـي جازعـه
والـدم لـوراق بعـده باتـراق=دمـا وماضنهـا متفـارعـه
هذايدورغريـمـه باشتـيـاق=وذاك هارب وخصمـه تابعـه
وصاحب الدم ينسـاق انسيـاق=ونـار ثـاره بتبقـى والعـه
يضل يتنشق المـوت انتشـاق=ولومعه فـي حياتـه مامعـه
ماتنطفـي نـاره إلا بانزهـاق=روح اعتدت أورئآهآ نازعـه
في ذلك الحيـن يتهنـى مـذاق=النوم والناس تبقـى هاجعـه
ماعاد بايسرق السمع استـراق=يمشي وبيضاء ترفرف ناصعه
وهكذا الثـار يُخلـق باختـلاق=الجهـل وآ آثـآره المتتابعـه
والا قد الكل حاسـس بختنـاق=ماواحـد إلا ونفسـه ناكعـه
لاحـظ بنفسـك إذا مـا دم راق=والناس في حينهـا متنازعـه
إن كان له من واء الضهر واق=كـل القُبـل باتثورهـا معـه
وان كان مال القتيل اي التحـاق=ولا وساطه ولا اسره شابعـه
من سوف يآخذ بثاره واللحـاق=بقاتلـه والأيـادي الضالعـه
مادام والأمن مالـه اي طـاق=ولامعـه اي قـوه رادعــه
لو يمضغون الدماء بين البصاق=لن يستطيعوا يزوعوا زايعـه
ياأمن ما أمن النـاس القـلاق=ياعدل وين العدالـه ضايعـه
هل آن نلقي قدم أمني وسـاق=والعدل هل آن يمنحنـا سعـه
أم أن شعب اليمن بيضـل بـاق=رهن المحن والمآسي طابعـه
يكفيه ماقد مضى به في غـلاق=سنينـه التاسعـه والرابعـه
ومانشاهد ونسمع في العـراق=من المذابـح أدلـه ساطعـه
تبت يد الفسق والناس الفسـاق=واهل الفساد الأداري جامعـه
ون قالـوا القبيلـه بالاتـفـاق=ضرر فقد رُب ضـره نافعـه
كانـت قديماًبحـدات الــذلاق=أكبر قبيله تجي لـك طايعـه
واحكامها بالمـراود والحـلاق=تمضي وكل القبايـل خاضعـه
ماليوم ماهـل نعتقهـا عتـاق=من بعد ما الكل ضيع وازعـه
ياليت والأمن يمسك بالوشـاق=يقمع بشـده وقـوه رازعـه
لاكن عليلة مُصابـه بالفتـاق=وكل الامراض فيهـا واقعـه
وكل ضابط زفيـره والشهـاق=مايآخذه غير لا املى لاجعـه
لن ننهـي الثـار إلا بانطبـاق=أحكام ربي بصـوره قاطعـه
ولا قد الوعـي والتعليـم فـاق=الجهل بتكون خطـوه رائعـه
واتناسق العدل والأمن انتسـاق=للزام الأطراف ذي متشارعـه
وكل مسئـول حـارب لرتـزاق=بصدق نيـة ونفسـه قانعـه
وحاول إصلاح من حوله وتـآق=لردع كل النفـوس الطامعـه
ختامها ضاق بالحرف الخنـاق=بالكاد صغنا الحلـول النافعـه
عليك ياشافعـي يـوم التـلاق=صلى فؤادي ونفسي خاشعـه